<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 1 Глава девятая О еже не уязвлятися лицами, и не порабощатися похотию плотскою. Не уязвляйся сердцем в красоте лица тленныя плоти: трава и цвет ея отпаде: Божественная же точию любовь пребывает во веки. Не зримыми красотами уязвляй свое сердце, но к зримых и незримых содетелю ум и душу свою возводи. [2] Воззрения с вожделением не красоту чуждую, и безстуднаго прикосновения, лобзания же и осязания, яко смертоносна яда бегай, да не в глубину греховную погибели впадеши, и в сети диаволи останеши: преткнувся же в сем, кроме скорби и тяжести никогдаже пребудеши. [3] Не любодействуй в сердце твоем с тварию, да не прогневаеши Господа сотворшаго ю: зело бо вмале тварь и плотская сласть приносит утешение, потомже абие наводит мерзость и тяжесть душе. Малое приобретение, велика же тщета: малое веселие, велика же скорбь: несть от сих толико утешения, елико по сих тяжести и горести. [4] Не прельщайся лепотою, и поставою и прекрасным лицем: удобь бо сокрушаемо и исчезновенно есть. Памятствуй по пременении красотном гной, и по обуревании похотном бывающия скорби и тяжести: то никогдаже прельстишися, ниже коею красотою плоти, и похотию греховною ят будеши. [5] Ведая буди, яко в мале времени сладок есть грех, в долго же время есть горек: вмале утешен, надолзе же скорбен: вмале радостен, надолзе же плачевен, и при разлучении от тела, зело тяжестен есть, и многопечален душе. [6] Аще не искусил еси греха, искушати его вещию не хощи, да не удицу смертную в горести его снеси: и не искушающи бо его веси, яко мерзостен есть, и по нем горька болезнь, и вкусивши его, несть мощно избыти скорби и печали. [7] Не приемли в сласть временныя сласти: всяка бо временная сласть не пребывающая вечно, суетна есть: всякое утешение плотское исчезновенно есть: всякое наслаждение временное явственная прелесть и тяжесть душе. Похоть плотская смерть есть душе: Божественное же желание и любовь, живот есть, и присносущная радость. [8] Памятствуй, сласть временную и красоту плотскую быти гной, и в тление обращение, и никогдаже настоящим безсловесно пригвоздишися. Плотскою любовию не уводися, ниже утешение свое в ней полагай: прелестна бо есть, ложна и лицемерна, никогдаже во единой мере стоящая, ниже во веки пребывающая. [9] Не прилепляйся тамо, идеже несть вечно: ниже утешения ищи, идеже есть превратно: мнози бо безсловесно уязвившеся красотою лица, и похотию плотскою прельстившеся, мног соблазн и претыкание многим составльше, жизнь свою зле скончаша, и бесу быша подручницы: и маловременныя ради сладости, жизни вечныя оттщетишася. [10] Богу единому буди порабощен и того добротою, и Божественною любовию уязвлено сердце свое имей, и не прельстишися во веки, но паче всех прелестей превышше будеши, в мире и покои всегдашнем обрящешися: приимеши же и получиши Благую часть, яже не отимется от тебе во веки.