<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 1 Глава седмая О еже не порабощатися плотскими сладострастьми, но Духовнаго утешения в Господе взыскивати выну. Богатство всяких земных сластей аще течет, не прилагай сердца своего, глаголет Пророк (Псалом 61). Почто к сим имаши прилагати свое сердце, понеже ти не во веки дана суть, ниже кую пользу ти приносят, но паче вред? искусил бо еси не единою, и познал еси, яко всяка временная сласть приносит тяжесть: всякое плотское наслаждение связывает душу, и творит ей всегдашний мятеж. [2] Не лакомься на сия, яже тебе уже не единою довольно в сласть и в сытость быша: не единою сими уже сердце и душу свою обременил еси, во ядении и питии, во сне же и во иных всех вещех. да предваряет и предходит пред тобою всегда память и разсуждение: да не в забвении всегдашнем часто претыкаешися, и во вся злая впадеши: воздержавай плотския похоти, да с сими удержиши вся злая. [3] Не во временных сластех утешения ищи, но в Господе вся сотворшем вечнаго и присносущнаго наслаждения всегда взыскуй: не повинуйся гортанному безсловесному сладострастию, но точию нуждная в потребу Благоразумно приемли, аще бо повинишися плотскому сладострастию, тогда связавши тя узами своими, никогдаже мирна оставит, но во вся страстныя глубины бедне вринет тя. Памятствуй, в каковый конец сласть и похоть плотская приходити обыче, и ктому множае ими прельщатися не хощи. [4] Мню, яко не единою, но многажды сласти плотския искусил еси: веси, яко всякая плотская сласть приносит тяжесть, всякое земное утешение влечет с собою горесть. обаче всегда забвением прельщаешися: тогда точию раскаяваешися, егда горесть и тяжесть их обносиши: егда же прейдет, тогда паки на тыяжде, яко пес на своя блевотины (2 Пет\р за\ч 67) безсловесно обращаешися. действо есть твоего нечувствия и слепоты. [5] Не мни туне восхитити Небо, аще небесне не поживеши: ниже Царствие Небесное наследиши, аще не воцаришися над похотьми и разуменьми. не льстите себе, рече, ни блудницы, ни татие, ни пияницы, Царствия Божия не наследят (1 Кори\н за\ч 134). Якоже бо кто зде стяжет что, сие и тамо с собою имети будет: каково кто име днесь предложение и действие, сицево тамо вообразится в души начертание. Темже не зело желательне безсловесному сладострастию прилежи, да не мзду себе сими восприимеши, да не услышиши гласа реченнаго: восприял еси благая твоя в животе твоем (Луки за\ч 83). не нова бо тебе сия суть, не нова: не единою бо уже сими скорбь и смущение себе сотворил еси. [6] Претерпевай малую алчбу и жажду неистоваго чревобесия, да не сугубо вред и тяготу приимеши, и в зельную по сем скорбь и печаль впадеши. веждь бо, яко уже не единою прельстился еси, ктому вящше прельщатися не хощи, да не сам себе будеши ратник и немилостив заклатель. [7] Не повинуйся плотской сласти и похоти: но похотение плотское, пищу и питие, на Божественное желание прелагай, да свойственное Божественное желание, несвойственную плотскую сласть и похоть далече от души истребит, и свойственное утешение душе твоей подаст: не о хлебе бо, рече, едином жив будет человек, но о всяком глаголе исходящем из уст Божиих (Матф. за\ч 7). [8] Несть бо свойственная сласть плотская душе человечей во утешение: но от преступления адамля есть роду нашему прибывшая. по нужде сия плотская тленная сласть до времене попущена бысть, понеже Божественныя Духовныя пищи еще ясти не научихомся, ниже навыкнути ея хощем: но безсловесно отрицаемся, ниже ясти ея разумне изволяем. [9] В грядущем вечном веце, не сею тленною пищею и питием питатися имамы, но Божественною, присносущною Благодатию пресвятаго Духа. Потщися о сей разумней Божественней пищи, еюже питатися имаши во веки: несть бо известного утешения и покоя в плотской сласти, но непрестанное души томление и мятеж. Несть толико утешения, елико тяжести и горести: не может бо несвойственное прибывшее от преступления тленное питание, свойственнаго душе даровати утешения и покоя, но тяжесть и смущение всегда приносити обыче. [10] В плотской сласти, в ястии и питии, несть душе мира и покоя, но всегдашняя борьба и мятеж, мрак и тма: и самая та пища и питие, со зельным попечением и молвою бывати обыче: паки же и в сонном спании несть покоя и тишины, но мечтания мрачная и смущения прелестная. Божественная же Духовная безсмертная пища, мир есть души, тишина жизни, свобода духа, пространство совести, радость же и всегдашнее веселие: упиются бо, рече, от тука дому твоего, и потоком сладости твоея напоиши я (Псалом 35).