<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 1 Глава пятая О еже во всем последовати разуму, и разсуждению, неже безсловесной плоти. Пред всеми вещми и во всех вещех да предваряет и предходит пред тобою всегда прав разум, и разсуждение: и никогдаже ни в чем прельстишися, но паче всех прелестей превышше будеши. якоже внешния вся вещи не могут быти зримы, точию очима, сице ниже внутренняя Духовная могут быти разуменна, точию разумом и умным разсмотрением. [2] Да не начинаеши, ниже что когда дееши, дондеже Богу молитвою соединяяйся, разсудиши: ничтоже бо сице во всех вещех непреткновенна, и непоползновенна человека творити обыче, якоже прав разум и разсуждение. Да смыслиши о всех, яже аще дееши, рече ко иисусу навину Господь (Иису\с Нав\н. гл\ва 1). [3] Якоже не безбедно слепый шествует, сице ниже безумный что творит благо: сего ради не повинуйся плотстей похоти и желанию, но точию во всех вещех разуму и разсуждению всегда последуй. [4] Первейшая вина бысть адамлю падению, якоже рекох, безумие: аще бы предразсудил себе заповедание, аще бы последовал разуму, не бы преслушал, не бы вкушением древа заповеданнаго прельстился. [5] Никтоже может пасти, и согрешити, разуму и разсуждению последуя: ниже содеяти что благо, не имеяй праваго разума. Якоже начало и корень всякому греху безумие есть, и безсловесное себе непознание, сице и начало всякому благу прав разум и разсуждение. [6] Слепый внешнима очима во всех стезях своих многажды и различно претыкается, сице и не имеяй праваго разума, ниже следуя разсуждению, во тме неразумия и греха всегда шествует, познавый же себе, и зряй мысленный свет, всегда во всем непреткновен есть. [7] Что есть грех? точию плотския похоти действие. плотския же похоти действие, что есть? Ничтоже ино, точию безумие: и никтоже согреши, точию в безумии и неразсуждении: ниже содеет что благо, точию в разуме: ниже что злое, аще не в безумии. [8] Всякаго греха всегда предваряет безумие, добродетели же и благодеяния разум, не дарует никогдаже безумие человеку покоя, ниже совершеннаго утешения, аще не сам разум упокоит, и просвещением своим утешит душу. Якоже бо слепому не мощно имети покоя, донедле не зрит света, сице ни безумному, дондеже не приидет в разум. [9] Темже паче всех добродетелей да предпочтени будут, разум и разсуждение: се бо есть начало и вина всему благому. ни бо добродетель добродетелию, яко подобает, быти может, аще разсуждение и разум спомогателен и предводителен делу не будет. [10] Якоже всех естественных чувств, честнейшее и радостнейшее есть в видимых зрение, сице и в мысленных разумеваемых, честнейший и утешнейший есть разум, и всех вещей познание: се бо есть и живот вечный, се же и отпадение, и приятие томления.