<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 1 Глава четвертая [Зри указание главам] О еже дотоль в делании Духовном труд есть и подвиг, дондеже не приидет кто в просвещение разума. Внешний человеческий мира сего разум, человеческаго внешняго учения требует: Духовный же внутренний, не человеческаго, но Божественнаго учения, от самаго Господа да взыскует. Ина даскалия человеческая, ина же Божия: якоже человек учения человеческаго от человек учится, сице и от Бога Божественнаго подобает учитися. Не учивыйся кто от человек человеческих, не может, яко подобает, разумети человеческих, сице ни от Бога, Божиих: чрез делание же умное, и чрез молитву и умиление слезное, Божественнаго разума учится душа: обаче же научивыйся кто от Бога Божественных, возможет и кроме учения человеческаго, разумети вся человеческая: от Бога же не учивыйся Божественных, ни мало может разумети Божественных, точию плотская человеческая. Дух святый есть источник всякия премудрости и разума: получивый его кто, вся внутренняя и внешняя разумети и познати может. [2] Апостоли не от человек учишася инеми глаголати языки, но нашествием пресвятаго Духа, внезапу различными языки глаголаху, якоже Дух даяше им (Деян. за\ч 3). И Господь не книгу ученииком в научение разгну, но ум отверзе им разумети писания (Луки за\ч 114). Сего ради точию тщания и подвига со тщанием потреба есть, да приимем и получим Благодать. Вся, яже суть нам ключимая, удобь обрящем, и имети будем, точию да прилежно печемся: всяко бо учение и всяка вещь на тщании и на прилежании усердном залежит, тщащийбося всяко извыкнет. Учайся, всяко навыкнет и научится, якоже во внешнем, сице и в Духовном: не тщайся же, и попечения о сем не творяй, ничтоже навыкнути может. Сего ради поощряя и наказуя нас Господь, глаголет: просите, и дастся вам, ищите, и обрящете, толцыте, и отверзется вам. всяк бо просяй приемлет, и ищай обретает, и толкущему отверзется (Матф. за\ч. 20). [3] Якоже во внешнем учении, суть различная преспеяния и степени, сице и в Духовном Духовная: и по мере тщательнаго подвига и преспеяния, подается просвещение разума: такожде и по мере просвещения разума, подается Господня Благодать: елико бо кто наипаче подвизается, толико и преспевает, толико и просвещается, толико и соединяется Господеви. Преуспевый же, и просветивыйся душею, и соединивыйся разумом Господеви, спасения своего известен есть, и прежде воскресения плоти, воскресе душею, и живет всегда Господеви. [4] По елику кто делает разумом, по толику познавает свою немощь, и по елику познавает свою немощь, по толику просвещается в разуме, по толику и преуспевает во смирении и умилении. Не познает же никтоже своея немощи, точию долгим временем, и многим искусством, дондеже совершенне отвсюду увесть свое неможение, и самою вещию познает, яко ничтоже от себе имать. [5] Не первее же кто познает свою немощь, дондеже не будет сотрен и сломлен различными искушения попущенми: и дондеже всех сих на себе не искусит, не может совершенно приити в познание себе и своея немощи, и быти смирен. Сего бо ради Бог своих рабов различными искушенми первее искушати обыче, яко да познавше свою немощь, пребудут всегда смиренни, ни мало на себе надеющеся: злато бо и сребро кроме искушения и разжизания не совершается. [6] Якоже былие, глаголемое лен или конопль, аще не будут сотренна и сломленна в древяных на то учиненных орудиях, ничтоже содеяти от них кто может: ни верви, ни нити, ни платна, ни инаго коеголибо дела в требование: сице и душа не сотрена, и не умягчена различными искушенми, не возможет приити в совершенное своея немощи познание и смирение. Сия же вся многаго труда и подвига требуют, и умнаго всегдашняго делания, дондеже кто познает самаго себе и свою немощь, и пребудет всегда смиряяйся. [7] Сие труд есть предо мною, дондеже вниду в святилище Божие, глаголет Пророк (Псалом 72). Дотоле бо труд, дотоле подвиг, донележе не прозриши, донележе в совершенное познание себе не приидеши, донеле любовию себе с Богом не соединиши. Егда же себе познаеши, егда любовию Богу совершенно соединишися, тогда ни единаго подвига и труда имети будеши, тогда в покои, радости же и веселии всегдашнем обрящешися. [8] Дотоле труд есть слепому, дондеже не прозрит: дотоле болезнь недугующему, дондеже не оздравеет: дотоле нужда учащемуся, дондеже не навыкнет: егда же добре навыкнет, никоегоже труда имать. Что бо за труд есть зрящему, добре зрети свет? Что за труд есть познавшему себе, познавшему Бога, знати вся сущая? Что за труд есть и подвиг любящему, любити любимаго? Никоегоже: но паче вся ему радостна, и желательна суть. Бывый кто слеп, и прозревый, гнушается ктому слепоты, ниже имать труда в зрении, но паче радостно наслаждается света: познавый и просветивыйся в разуме, гнушается безумия: стяжавый кто богатство, не ктому хощет быти убог. [9] Пременивый безсловесие на познание и просвещение разума, ярость и гнев претворивый на кротость, сласть и похоть плотскую безсловесную на Божественное желание и любовь, в мире и покои будеши, в радости и тишине всегда обрящешися. Тогда тричастное души во глубине безстрастия, и просвещения разума потоплено видевши, яко в тимпане во умерщвленном телеси воспоеши Духом радуяся Господеви, победное воспевание. [10] Дотоле не можеши быти без скорби, дотоле не можеши быти без печали, дотоле не можеши быти без страха и боязни, донеле себе совершенно не познаеши: донеле совершенно не вскиснет тричастное души в познании и просвещении разума, и очищении страстей, донеле с Богом не примирен будеши, донел с ним во един дух не соединишися. Егда же соединишися. и егда его всем сердцем возлюбиши, тогда без боязни и печали всегда будеши: о Бозе едином будеши духом всегда радуяся и веселяся во веки вечныя.