<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 1 Глава третия О еже не делаяй кто разумом, и не очищаяй его, не прав и не истинен есть разум. Разум неделан, и долгим временем не очищен, разум не разумен есть, не прав и не истинен есть разум. Есть же разума различие, якоже и всех внешних вещей. Есть бо разум совершен, духовен, есть же посредний, Душевен, есть же отнюд груб, плотский. Якоже убо внешняго учения, или коего художества, никтоже навыкнет, не всегда о нем поучаяся и попечение творя: сице и совершеннаго Духовнаго разума и очищения умнаго кто изучится, не всегда о сем прилежание творя? [2] Не потщавыйся кто пройти собою тесный путь евангельский, и о очищении ума вознебрег, аще и всю внешнюю мудрость извыче, слеп есть душею: писма точию убивательнаго придержится, Духа же оживляющаго не приемлет: и не точию инех, но ниже себе совершенно исправити может. Ин бо есть разум мира сего, ин же есть Духовен: Духовнаго бо разума от пресвятаго Духа учишася вси святии, и просветишася яко солнце в мире. Днесь же не от Духа свята, но от аристотеля, цицерона, платона, и прочиих языческих любомудрцев разума учатся. Сего ради до конца ослепоша лжею, и прельстишася от пути праваго в разуме. Святии заповедей Христовых, и умнаго делания учишася: сии же точию словес изглаголаний учатся: внутрь души мрак и тма, на языце же вся их премудрость. [3] Не может прав и истинен разум, удобь в душу быти углублен, аще не долгим временем, и зелным трудом, и подвигом, и тако по мере подвига и труда, умерщвляются плотския похоти, и по елику умерщвляются похоти, по толику процветает и возрастает истинен разум. Сугубаго же всем требе есть подвига, якоже внешняго труда, сице и делания умнаго: един бо кроме другаго не совершается. [4] Навыкнувый кто внешния мудрости, Духовную же вознебрег, подобен есть о едином оце, или о единой нозе сущему. Внешняя мира сего мудрость и телесный труд, кроме умнаго делания, яко сосцы сухи, яко древо неплодовито, глаголет некто. Того ради не преставаху святии, на едином внешнем точию труде и учении, но потщашася навыкнути и внутренняго, сиречь очищения умнаго. Аще бы во внешнем учении точию были училися, в Духовном же ни, не были бы святи, ниже благодать пресвятаго Духа пребывала бы в душах их. [5] Вси елицы внешняго наказания навыкше, о Духовном внутреннем делании, о очищении и просвещении разума нерадиша, всеконечно обезумишася, и развратишася в различныя страсти, или в ереси погибельныя впадоша, якоже арий, савеллий, евтихий, и прочии мнози, иже не искусиша, ни познаша Бога имети во своем разуме: сего ради предаде их Бог в неискусен ум, творити неподобная, глаголет апостол (Рим. за\ч 81). [6] Аще кто и всю мудрость мира сего извыкнет, не очистит же ума, ниже просветится душею, Богу соединитися не возможет. Не соединивыйся же Господеви в разуме Духом, в стезях безвестных есть. очищается же и просвещается ум сугубым подвигом, якоже рекох: хранением Господних заповедей, и умным всегдашним деланием, паче же всегдашними теплыми слезами. Инако бо до просвещения умнаго никтоже приити возможет. [7] Всяк ум не делан, не просвещен, не осолен бывши солию Благодати пресвятаго Духа, обезумится, и различными страстными деянми и помышленьми возсмердится. Разум бо комуждо естественно от Господа всажден есть, обаче не делаяй кто им, помрачается и потемневает: делаяй же уясняется, и в совершенное просвещение приходит. [8] Якоже и малейшее отроча, не требует учения, телесныма очима зрети свет, (аще не недужно есть зрением) сице не требует кто и внешняго учения ко премудрости Духовней, и соединению разумом Господеви, точию очищения и просвещения умнаго. Мнози бо не точию внешняго учения неискусни, но и отнюд препрости бывше, премудрости Духовныя умным деланием и хранением Господних заповедей научишася, и великим даром причастницы быша, якоже антоний, пахомий, павел препростый, и инии. [9] Первейший есть ум паче учения внешняго и писмене. Не бо от писмене, и учения внешняго обретеся и возрасте ум: но от ума вся сия родишася и возрастоша. Бог естественно ум комуждо даде, внешняго же учения разум от человек прибысть: того ради паче всех, должни есмы имети тщание о очищении разума. Ум очищен и просвещен бывши, вся внешняя и внутренняя разумети и востязати может: Духовен бо, востязует убо вся, а сам той ни от единаго востязуется, рече апостол (Ко\р за\ч 127). [10] Всяка жертва солию осолится, рече Господь: не осолена же бывши возсмердится (Ма\р за\ч 42). Сице и душа, есть свойственна Богу жертва, по рекшему: жертва Богу Дух сокрушен (Псалом 50). не осолена же бывши солию благодати пресвятаго Духа, всяко возсмердится безумием, и исполнится различных страстей. Аще и всю мудрость мира сего кто извыкнет, не осолится же солию святаго Духа, и не будет причастен Господни Благодати, весьма непотребен пребудет, якоже не имеяй в себе начертанна образа цр\ска, вне измещется чертога Христова: аще кто, рече, Духа Христова не имать, сей несть его, глаголет апостол (Рим. за\ч 96).