<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 1 Глава вторая О еже делати подобает разумом и хранити Господня заповеди. Рекохом, яко первейшая вина и начало бысть адамлю падению безумие, благому же деланию и начинанию разум, обаче же прав и истинен разум глаголю: разум бо со истиною приятен есть, кроме же истины, отвержен есть. Прав же разум возрастает и умножается от делания умнаго, и от хранения Господних заповедей, якоже и в раи адаму заповедано бысть делати и хранити: но понеже не делаше разумом, сего ради не сохрани заповедания. [2] И беси бо мнятся быти премудри и разумни, обаче не пребывают, ниже пребыти хощут во истине, сего ради отвержени суть. Якоже неприятна есть милость кроме истины, сице ниже премудрость неправедна: но обоя особно да соравнена будут, якоже глаголет Пророк: милость и суд воспою тебе, Господи, пою и разумею в пути непорочне (Псалом 100). Сице и разум равен с правдою, воспевати и имети подобает безпорочно. [3] Ничесоже Бог тако требует и любит якоже разум прав и истину, о сем бо и подвиг нам есть, о сем и труды, о сем и попечения, да получим прав разум, и содержим истину, и пребудем в ней несовратно даже до кончины. Буди ми верен до смерти, и дам ти венец жизни, глаголет Господь (Апок. гл\ва 2). Развратно же сопротив истине вся мудрствующе и глаголюще, аще и велемудрствуют, аще и многокознствуют, лжу вместо истины представляют: обаче лжа правдою никогдаже быти может, ниже Господеви прията есть. [4] Мнятся же и еретицы, и вси зле мудрствующии быти премудри и разумни: но убо не пребывают, ниже пребыти хощут во истине. Помрачишася бо в разуме, и ослепоша лжею: сего ради мудрость их отвержена, и поглощена бысть. Не прията есть мудрость со лжею, ниже философиа с неправдою: якоже и западнаго сословия любомудрцы, сопротивная Церкви мудрствующии, истину в неправде содержаще, како прияты имут от Бога быти? Никакоже. [5] Разум уклоняяйся истины, неправ, ниже от Бога приятен есть разум: и обретаяйся кто в нем, в злолукавная действа нисходит, и бесу подпадает во власть отцу лже, и в различие впадает еретическое. Взыскуяй же праваго и истиннаго разума, взыскует Господа, и обрящет его: нигдеже бо никтоже обрести его может, точию в разуме праве и истине. [6] Якоже стреляющии неправо, далече погрешают целя, сице и неправо мудрствующии, далече отстоят разума Божия: и приближения его мнози желают, мнози ратятся, мнози о сем тщание имут, обаче не вси равно, и право в цель намеряют. сего ради далече целя отстоят в безвестии. [7] Рожденное от плоти, плоть есть: рожденное же от Духа, Дух есть, глаголет Господь (Иоа\н за\ч 8). Якоже плоть плоти сочетаяся, раждает плоть: сице и прав и истинен разум, соединяяся в познании всех вещей разуму Божию, зачинает начаток Духа, и по пождательном времени, в водимых подвизех всегда пребываяй, раждает Дух. Страха бо, рече, ради твоего во чреве прияхом и поболехом, и родихом Дух спасения Господни Благодати, и Божественныя любве его, глаголет Пророк (Исаии гл\ва 26). Не имеяй же праваго разума, никогдаже сего получит. [8] Обаче же, хотяй кто имети прав разум, делания умнаго всегда требует, не делаяй бо ума разумом, ниже тщайся о сем, аще и есть естественный, или от внешних любомудрцев учимый разум, ничтоже пользует: якоже злато в земли сущее, неделанное же и непережженное в малой цене есть: или якоже древо не исчищаемо, не прицепляемо, не пресаждаемо, мал и не сладок плод приносит. Елико же им кто наипаче делати будет, толик плод и пространство узрит. [9] Делание умное, имже имамы приближитися, и совершенно присоединитися Господеви, сие есть: еже познати первее всю тварь, видимую и разумеваемую, от кого и чесо ради сотворена бысть, и камо движима, и обращаема есть, и уверитися о сем истинно. Таже себе, и все еже о себе таинство, таже и вся его Благодеяния. Ово, глаголю, разум прав, и истинен есть, познати вся сия подробну, во еже ни единой вещи от него утаенней, и недоуменней быти, и углубити сие в себе долгим временем, во еже быти ему с сим, яко единосрасльну, и во едино соединенну. Не доспевый же в сия, и дерзаяй высокая о себе мудрствовати, и Богословити, аще и всю мудрость мира сего извыче, безумен и во всем слеп есть, и сетей злокозненнаго не убежит. [10] Обаче хотяй кто удобнее приити в познание твари, в познание себе, таже и Господа, да чтет наичастее книжицу, нареченную седмодневник, в немже о сем пространнее начертахом. Сия же вся не могут быти кроме труда, и зельнаго подвига, и умнаго всегдашняго делания, и пождательнаго долговременнаго времене. Якоже зерно пшенично в землю ввержено бывши, не абие возращает клас: или квас в муки сати три вложен бывши не абие вскисает, по притчи евангельской: егоже приемши жена душа, квас слова Божия скры в муки сатах трех тричастном души, согревая и квася в себе слово Божие, долгим временем, дондеже вскисе все, в познании и просвещении разума, и всего о себе таинства (Матф. за\ч 53).