<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Часть 1 Глава первая О еже первейшая вина бысть адамлю падению, неразумие, и всеконечное себе непознание. [1] Мнози многия и различныя предлагают адамлю падению вины: едины безверие, друзии преслушание, третии же гордыню, и славолюбие, инии же ины различныя вины: мы же ни едину от сих первейшую быти мним, точию безумие и всех вещей неразсмотрение. (Книга обед сл\во 2 на нл\дю 26) [2] Первейшая адаму в раи бысть заповедь, еже делати, и хранити, сиречь делати разумом, еже разумети добре, и хранити заповедание, еже не преступати. Но понеже не делаше разумом, сего ради не сохрани заповедания: от неделания бо умнаго, первее возрасте в адаме неверие, во еже не веровати Богу, иже рече и заповеда: посем от неверия преслушание и преступление, от преступления же отпадение Господни благодати, и Божественныя его любве отчуждение. [3] Аще бы разумел адам Благодателя, и предразсудил себе заповедание, не бы не неверовал заповеданию: аще бы веровал, не бы преслушал, не бы вкушал заповеданнаго древа, не бы изгнан был из рая, не бы подпал смерти и тлению, не бы Бог толико о нас чудодействовал дотоле, донеле приведе нас в древний разум, и всех вещей познание. [4] Якоже не иною виною отпаде адам от Бога и его Благодати, точию безумием: сице не инем чим паки кто присоединится ему, точию разумом, и всех вещей познанием. Познавый бо кто истинно себе, позна Бога, и познавый Бога, позна себе: с Богом соединен есть, и почив от всех дел и трудов своих, вниде во святилище Божие, и приносит Богу всегда умную Духа службу. [5] Обаче никтоже может познати Бога, донеле не познает первее себе, не познает же совершенне себе, донеле не приидет первее в познание твари, и всех вещей в мире зримых, и разумеваемых разсмотрение. Егда же прииде в познание сих, тогда возможет приити и в познание себе, таже и Бога, и тако приходит в совершенное с Богом любовию соединение. [6] Темже, аще кто истинно хощет познати Господа, познати себе, и с ним любовию соединитися: да познает первее всю тварь, видимую и разумеваемую, да увесть всех вещей, и всея твари разсмотрение, от кого, и чесо ради сия суть, во еже ни единой вещи утаенней и недоуменней быти от него, таже себе, и все еже о себе таинство, таже Бога, и вся его неизреченная благодеяния, и тако приходит в совершенное всего познание: ибо подобает долняя вся разумети, таже горняя: не бо от горних на нижняя восходити должни есмы: но от долних на вышняя. Того бо ради всю тварь, и все мирское устроение, якоже некое училище, или зерцало, пред очи наши Бог положи, яко да учащеся, от долних восходим на вышняя: аще же долних не познаваем, то како горняя разумети имамы? [7] От разума и познания раждается вера, от веры же заповедей Божиих хранение, от хранения же заповедей Божиих упование на Бога, от упования же на Бога Божественная любовь: сей же умноженней бывшей, совершенное бывает с Богом соединение, и исполнение закона и Пророков. [8] По елику процветает разум, по толику возрастает и вера: и по елику возрастает вера, по толику умножаются добродетели, по толику раждается и упование на Бога: и по елику кто уповает, по толику и Бога любит, и по елику любит, по толику и с Богом соединяется, наслаждающися Божественныя его славы. [9] От безумия раждается неверие, от неверия же преслушание, от преслушания же всяк грех и преступление. Како кто может веровати, ничтоже разумеяй? не веруяй же, ниже разумеяй ничтоже, како может сохраняти Господни заповеди? не сохраняяй же Господни заповеди, како может имети на Бога упование и любовь? Никакоже. [10] Темже прежде всего, подобает учитися, не точию внешнему труду, но и деланию умному, разуму, и всех вещей познанию, удобне всему веру емлет, сохраняет вся Господни заповеди, уповает на Бога, любит его всем сердцем своим, и соединяется с ним во едино, во еже быти ему всему в Бозе, и Богу в нем. Сицевый прежде воскресния, воскресение души приемлет, и прежде жизни, жизнь вечную наследует, во еже пожертой быти безсловесия смерти, разума и познания жизнию: се бо, рече, есть живот вечный, да познаем Господа, се же и смерть, не разумети о нем.