<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Алфавит же сей Духовный сице зде положихом [А] Аз, адамля естества сый, тебе, обоего пола, естества адамля, советую: смирен буди. Адамля естества сый мирен буди, памятствуя праведнаго осуждения слово реченное: яко земля еси, и в землю паки пойдеши. (Быт. гл\ва 3) [Б] Бога познавай, Благодеяния его разумей, в заповедех его ходи, да наследник будеши вечных благ. [В] Веруй в Бога, веруй Богу: воздержание всегда во всем имей: присно памятствуй смерть, и всех вещей изменение и ни единым чим ят будеши в мире. [Г] Греха, от мала даже и до велика блюдися: грех твой пред очима всегда имей, яко да усердне на всяк день прилежиши покаянию. [Д] День от дне к горе добродетелей восходи, усердие ко усердию непрестанно на всяк день прилагай, да управиши тебе во вся стези правы. [Е] Есть бо Благим надежда, и всякому труду и подвигу вечный покой, и веселие, в грядущем веце возмездие. [Ж] Жизнь вечную, и грядущая Благая присно да поминаеши, яко да к сим всегда взимаеттися сердце. [З] Зело тщалив и усерден в твоем звании и свойстве буди, яко да не всуе изнуряеши твою жизнь. [З] Зря тварь чудися, и творцу твари славословие приноси, не к твари прилагай твоя чувства, но к Богу творцу всех сердце и душу возводи. [И] Иже о Благом имать усердие, дастся ему: а иже не имать, и еже мнится имеяй, возмется от него. [И] Истину люби, всякия лжи блюдися, да убежиши Пророческаго речения: погубиши всякаго глаголющаго лжу. (Псалом 5) [К] К Богу всегда ум твой, и душу непрестанно возводи, и никогдаже его от сердца и памяти твоей испускай, яко да всегда с ним соединен будеши. [Л] Любити Бога от всего сердца твоего, и от всея крепости твоея потщися: яко да известен спасения твоего будеши, и всякаго пристрастия земнаго свободишися. [М] Молитве непрестанно прилежи: то бо есть некрадомое сокровище, еюже удобь яко лествицею, к Богу взыдеши. [Н] Не прилагай сердца твоего к земным, да не яко соль обуяеши, и весь непотребен явишися: но к Богу единому сердце и душу твою пригвожденну имей, яко да неподвижимь в любви его пребудеши. [О] Он бо есть един Господь, источник всех благ, и вечныя жизни податель. [П] Памятствуй о Господе выну, в сердце и во устех твоих да пребывает имя его всегда. Покаянию присно прилежи, и на всяк день тепле слезами омывай душу твою, да убелишися паче снега, и не посрамлен лицем пред Господем явишися. [Р] Руце твои к Богу наичастее в молитве воздевай усердне, оттуду помощи всегда взыскуя, да победиши мысленнаго амалика, сиречь, диавола. [С] Смерть памятствуя, скупости и стеснения блюдися, да не неверием и скупостию ят бывши во время исхода, милосердия Божия двери себе затвориши. [Т] Тих, безтщеславен, и кроток ко всем бывай, яко да истинен Христов подражатель и ученик без порока явишися. [У] Уныния и лености зело хранися, аще хощеши вскоре снискати вечное сокровище. [у] Усерден и тепл к Богу присно буди, да причастник будеши вечныя жизни. [Ф] Фараона мысленнаго в воде слезной потопити тщися, да не всегда ратуя гонит тя. [Х] Христа единаго взыскуй, да с ним пребудеши во веки: взыскующии бо его обрящут велию милость, и не лишатся всякаго блага. [От] Оц~а и матерь, други и сродники, и Бога быти себе знай: он бо есть жизни начало, и конец всем безконечный. [Ц] Цель твоя и пристанище Господь един да будет, надежда же и упование, пресвятая его любовь. [Ч] Чистоту и целомудрие, истинно возлюби, да прилепишися чисте чистому: и час от часа покаяния не отлагай, да не погубиши время исправления всуе во время часа. [Ш] Шестокрилии добродетели, водружени в души твоей всегда да будут: сиречь, усердие, друголюбие, терпение, образ Благ, разсуждение и любовь, имиже удобь на Небо возвысишися. [Щ] Щедр и милостив ко всем буди, да милостива и Благоутробна Господа, в день страшнаго суда душе твоей обряшеши. Едино се в памяти своей имей выну, да Богу единому всегда угождаеши, и к нему любовию присно да восходиши. [Ю] Юностное похотное плотское безумие от себе отметай: премудрости же Духовныя о Бозе всегда поучайся всеусердне. [Я] Ярости, гнева и злословия зело блюдися, да не помрачиттися сердечное око. [О] Обядения и пиянства зело блюдися, да не во вся злая всегда впадаеши. [О] Оч~ескаго Духовнаго наказания не преобижай, да не в стезях твоих преткнешися. [Пс] Псалмы и песньми Бога безпрестанно славослови, да присно сие имаши себе во утешение. [Ф] Фарисейскаго тщеславнаго лицемерия зело блюдися, да не @восплащение@ {@мзду} твоих благ себе тщеславием зде восприимеши.