<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> Предисловие к любезному читателю. Прежде сея малыя книжицы, алфавит Духовный, вместо предисловия, любезный читателю, к поощрению и наказанию, комуждо самаго себе, напреди положихом: яко да прежде алфавит добре извыкше, к прочиих словес извычанию, и исполняти та делом уготовимся. Сия бо малая книжица на поощрение наипаче, и исполнение Господних заповедей, а не яко что велемудрствующе о вещех безместных, и излишних начертася, яко да усердне исполняем я. Вси вемы Господни заповеди, исполняти же та делом не имамы теплоты и усердия, но окаянне хотя и не хотя ленимся и не чувствуем. Тем яко да наичастее сию книжицу чтуще, волею и неволею возбуждати себе ко исполнению Господних заповедей, и ко очищению страстей понуждаемся: якоже бо кроме разжизания огня древо не горит, разжизаемо же наичастее, аще и сыро будет, возгаратися понуждается. Сице и наичастее кто себе поощряет и возбуждает, аще и отнюд уныл и окаменен есть, яко воск растопляется, и ко преуспеванию понуждается приходити, день от дне восходя на лучшая Божественная желания и разумения. Пойдут бо, рече, сии от силы в силу, глаголет Пророк, и явится им Бог богов в сионе познания и просвещения разума. (Псалом 83) Начертахом же сию книжицу, не сице инем к возбуждению, иже не требуют ни единаго возбуждения, якоже аз наипаче моей окаянней душе, зело бо окаменен и уныл есмь. Обретаяйсяже кто мне подобострастен, аще изволит и усердствует, да приемлет себе всегда поощрение и возбуждение, противу страстнаго насилования, мню яко пользоватися имать: не глаголати, яко прочтох аз единою или дважды: вем уже в ней вся начертанная, и довольно ми есть. Ни убо, не бо точию на уведание сия начертанная суть, но да и всегда в возбуждение и поощрение приемлемся: ибо непрестанно леностию, нечувствием, мнением, гордынею, сластолюбием, и прочиими страстьми борими есмы. Сего ради поощряти и возбуждати себе не престаем, не единою, но и всегда, в сей ли борбе, или в иной, да приемлем себе пособие, и приличное недугу нашему врачевание. Краткими же стихослогами написашася сия главизны, яко да возможет кто удобь наизусть навыкнути себе в требование страстнаго сопротивоборца: не всегда имеяй время взирати в самую книжицу. Прочее, здравствуй о Господе любезный читателю.