<::рус> источник: Алфавит Духовный, оцифровка Александра Акимова <::лат> http://ооо.зpиrиtalph.narod.ru/ <::слав> О еже точию о едином Господе радоватися подобает, а не о тленных мира сего вещех. Радосте моя, избави мя от обышедших мя, глаголет Пророк (Псалом 31 7), якоже егда ангел к товии глаголаше: Радуйся, рече товие, радость тебе всегда да будет. Товиа к ангелу отвеща: Кая радость мне будет, яко во тме сежу, света небесе не вижду? (Тови~ гл\ва 5) Что убо за радость имать быти душе, во удоле сем плачевнем, в темных и сени смертней, в безсловесных наследиях седя, ничтоже ино надеяся, точию смерти, точию отсюду разлучения, точию безвестныя кончины? Кая бо радость имать быти, в скорби и горести сущему? Кое веселие во тме седящему? Кая прохлада во узах обретающемуся? Кое утешение горестныя смерти надеющемуся? Никоеяже. Чим утешитися хощеши? Славою ли мира сего удобь исчезающею? Имением ли, или богатством, вскоре погибающим? Сластьми ли, или похотьми плотскими, в смрад и гной обращающимися? Благолепием ли, или красотою плоти, удобь тлеемою, в прах и пепел прелагаемою? Не имаши, человече, чим утешитися в веце сем плачевном, но паче плакати и рыдати достоит ти. Не во отечестве бо седиши, но во изгнании: не в мире и покои, но в борбе зельных ратей: не в радости и веселии, но во удоли сем плачевном. Кто веселится, в долгах сый? Кто утешается, в темнице седя? Кто радуется, смерти надеяся? Никтоже. Мир бо сей исполнен есть плача, а не веселия: скорби и печали, а не радости: тяжести и горести, а не утешения: ничтоже в нем есть постоянно и непреложно. Радость его смешена с скорбию, веселие с печалию, слава преложна, богатство исчезаемо, красота в прах и пепел прелагаема, наслаждение плотское в смрад и гной претворяемо. Последи же сия вся внезапною смертию пресекаются, и скончеваются. Ничтоже есть в веце сем достойно радости и веселия, ничтоже достойно утешения и благомыслия: но вся плача и рыдания исполнена: суета суетств век человеческий. Родится убо человек от тли, растет в болезнех и недузе: изнуряет же жизнь свою в скорбех и печалех, в молве, в буре и безвестии, и всяком непостоянстве: отвсюду бо беды, отвсюду наветницы, отвсюду гонители, отвсюду ратницы и сопротивоборцы, отвсюду борбы и недоумение, отвсюду боязнь и страхование: отвсюду несть мира и покоя. Весь мир исполнен беды и немирования: идеже обратишися, всюду борбу и рать узриши. Отсюду ратует обядение, отонуду же пиянство: отсюду леность, отонудуже нечувствие: отсюду похоть, отонудуже скверное рачение: отвсюду страх, отвсюду грех и преступление, отвсюду небезбоязнство: несть о чесом радоватися во веце сем многоплачевном. Но паки приидет же смерть, приидет отвсюду разлучение, приидет внезапное всех изменение: душа же пойдет во ин век, и приимет яже зде содея: а плоть останется червию в снедение, в смрад и гной обратится: ничтоже в нем есть радостно. Сего ради не радуйся ни о чесомже временном в веце сем плачевном: понеже все в нем непостоянно и превратно, все в нем ложно есть и пременно. Но аще хощеши утешитися, о Господе едином утешайся: аще хощеши радоватися, о Господе едином радуйся: радость бо плотская вскоре погибает, о Господе же радость пребывает во веки. Утешение земное внезапу исчезает, и в горесть обращается: утешение же Престаго Духа, о Господе присно утешает, и во веки вечныя утешати будет утешением неизреченным. Сего ради ни о чесом ином, но о Господе радуйся: Радуйтеся бо о Господе вси правии сердцем, глаголет Пророк (Псалом 31). и паки апостол: Всегда [рече] о Господе радуйтеся, непрестанно молитеся, о всем благодарите: (Солу\н за\ч 273) в сих бо триех спасение наше бывает. Ни о чесом ином, точию о Господе радуйся: всяка бо радость, аще не о Господе, ложь есть, прелесть есть: всяко утешение, аще не о Бозе, тяжесть есть, и смущение души. Темже не о пищи и питии, не о богатстве и славе мира сего радуйся, ниже о коих красотах, и безсловесных похотех, но о Господе радуйся, о Бозе едином веселием веселися: в сих бо временных радости истинныя несть, точию ложная, временная, безсловесная. Во тме бо света несть, в смерти жизни не обрящеши, во лже правда не явится. Радость мира сего ложна, утешение его пременно, веселие удобь прелагаемо. В мале радость и утешение, абие внезапу плачь и рыдание: еще утешение его не прейде, и абие уже скорбь и печаль постиже. Того ради о Господе едином радостию радуйся, и веселием веселися. Радуйся о Господе Бозе, яко Бог твой, Бог велий есть, вечный, безсмертный, всемогий, вседержитель, Бог щедр, милостив, Праведн, человеколюбив и премилосерд: отец щедрот, Бог всякия утехи. Его есть Небо и земля, горы, холми, древеса, дубравы: его зверие, скоти, гади, птицы пернаты: его всякое дыхание и вся тварь, видимая и невидимая, яже на Небеси и на земли: его солнце и месяц, звезды, и вся стихия Небесная: его воды, реки, моря, езера, источницы, грады, снези, дождеве, ветры, громове, молния: его вси человецы, вси роди земнороднии: его ангели, архангели, Престоли, Господьствия, херувими и серафими, и вся Небесныя силы. Тамо правда, тамо суд нелицемерен: тамо Благость и человеколюбие: тамо премудрость и источник разума: тамо тишина, покой, безбоязнство и безпечалие: тамо слава, богатство, сокровище, и вечное наслаждение: тамо радость, веселие, свет, озарение, красота, благолепие, сладость и всякое утешение: тамо свобода, пространство, обилие и век непременный. Аще что точию в человецех любимо, тамо все есть: точию ко Господу Богу твоему всею душею твоею прилепися, и о нем единем радостию радуйся, и веселием веселися. Радуйся о Господе, и благодарение ему приноси: яко сотвори тя по образу и по подобию своему, от небытия в бытие тя, славою и честию тя венча: не сотвори тя зверем, и ни китом, ни иным коим животным, но человеком, разумною тварию, безсмертием и самовластием душу твою почте. Аще и разлучаемся временно плотию, но на лучшее преселение преходим, душею же пребываем во веки: не на тысящу или две, или три тысящи лет, но во веки вечныя, конца не имущия. Радуйся о Господе, и благодарение ему приноси, яко вся тебе ради туне сотвори: тебе ради Небо и землю, солнце и луну, и все звездное Небесное украшение сотвори: тебе ради звери, скоти, птицы пернаты, и всяко животно: тебе ради моря, реки, источники, езера, рыбы различныя, киты превеликия: тебе ради лесы, дубравы, пустыни различныя: тебе ради видимая и невидимая сотворена суть. Радуйся о Господе, и благодарение ему приноси, яко вся о тебе праведне и милосердне устрои, и непрестанно промышляет о души твоей: защищает тя, сохраняет тя, покрывает тя, заступает душу твою, дарует ти крепость, здравие, живит тя, вразумляет тя, просвещает тя на всяка дела блага, вся праведная и премилосердная о тебе деет. Радуйся о Господе, и благодарение ему приноси, яко он Бог всесильный, пребогатый, тебе ради обнища, тебе ради человек бысть, да тебе соединит себе во едино: не возгнушася на ся взяти наша, да нам всего себе отдаст. Тебе ради в яслех положен бысть: тебе ради пеленами повит бысть, одевая Небо облаки: тебе ради осмодневен обрезан бысть: тебе ради бежа во египет: тебе ради во иордане Крестися: тебе ради главу предтечи приклони, да тебе вознесет горе, не требуя крещения Крестися, да тебе крещением очищение подаст. Радуйся о Господе, и благодарение ему приноси, яко тебе ради биен, безчещен, и оплеван, заушен, связан, терновым венцем уязвен бысть. Тебе ради руце свои на Кресте пригвозди, оцта и желчи вкуси, копием в пречистое свое ребро прободен бысть: тебе ради кровь свою пречистую излия, кровию своею искупи: тебе ради во гробе положен бысть: тебе ради тридневне из гроба воскресе, да всем нам из гроба воскресение дарует. Радуйся о Господе, и благодарение ему приноси, яко аще и тмами тем пред Богом согрешаеши, милостивне приемлет тя кающагося. Колико пред ним согрешаеши, он же единаче не отметает тя: колико ты преступаеши, он же не отвращается: колико ты падаеши, он же возставляет тя, долготерпит ти не абие смерти тя предает, но ожидает обращения твоего, даже до кончины, когда ты обратишися: даде тебе закон, и ведение воли своея: не отрину тя крещения, не остави тя во иноверстве, или пагубной ереси погруженну быти. Радуйся о Господе, и благодарение ему приноси, яко малаго ради некоего Благоугождения, жизнь вечную, Царство Небесное обеща дати. Сам сотворивый, сам создавый, и вся ко благоугождению давый, жизнь вечную дарует: не на время некое мало, не на время некое кратко, не на сто лет, или тысящу, или тысящ тысящей, но во веки вечныя, конца не имущия. Слава неисповедимому его милосердию, слава премудрому его устроению, слава неизреченной и непостижимой его Благости и человеколюбию! Яко тому подобает всякая слава, честь и держава, со безначальным отцем, и с пресвятым и Благим, и животворящим Духом, ныне и присно, и во веки веков, аминь.